今日同細佬喺旺角行完街，去咗Pastaholic食晚餐，餐廳位於旺角雅蘭中心，地點好方便。由於我哋兩姐弟都係有選擇困難症嘅人，所以就叫咗個Meat & Fish Holic Set，呢個二人套餐有九個items，所以都幾抵食。
首先係特濃南瓜粟米忌廉湯，飲落口好soft好軟綿綿，南瓜蓉加埋忌廉好香好滑，而且份量好多，我自己就飲咗一半留返個胃食主菜。頭盤仲有鮭魚凱撒沙律，三文魚都幾新鮮。Appetizer有五款俾大家揀，我哋就揀咗香辣番茄濃汁煮青口，青口肥美可口，不過番茄汁就比較淡，食落口唔算太辣，所以唔食辣嘅朋友都可以試吓。
到主食方面，溫泉蛋蒜香蘑菇鮮製意粉，遠遠已經聞到香味，呢一款係全素嘅意粉，可以將溫泉蛋拌勻，蘑菇嘅鮮甜味滲入意粉內，美味可口。而檸檬牛油烤原條白身魚真係值得推介，特別係個醬汁我會比滿分，外面好少食到呢隻味，小小嘅檸檬酸令人更開胃，魚塊都算滑身，配上車厘茄，有另一番清新嘅感覺。
呢個套餐仲送二人份量嘅甜品，我哋今次食到嘅係tiramisu，分量唔算太大仲有少少生果伴碟。
意粉狂熱 (旺角)
旺角彌敦道639號雅蘭中心2樓208號舖
#Pastaholic
#意粉狂熱
Search